Տավուշ. Դիլիջանի անտառներ, միջնադարյան վանքեր և Իջևանի գինիներ

Ճանապարհորդություն Տավուշի գեղատեսիլ բնաշխարհով, որտեղ հարուստ պատմությունը միահյուսվում է անաղարտ բնությանը։ Ճանապարհորդության ընթացքում նախատեսված են Հաղարծնի և Գոշավանքի վանքերի, Դիլիջանի պատմական թաղամասի, Պարզ լճի, կովկասյան ազնվացեղ եղջերուների վերականգնման և բազմացման կենտրոնի այցելություն, ինչպես նաև շրջայց և համտես Իջևանի հայտնի գինու և կոնյակի գործարանում։

Տավուշի մարզով անցնող այս երթուղին հնարավորություն է տալիս ծանոթանալ Հայաստանի միջնադարյան ճարտարապետության նշանավոր հուշարձաններին, Դիլիջանի պատմական միջավայրին և տարածաշրջանի գեղատեսիլ բնաշխարհին։

Երթուղու գլխավոր տեսարժան վայրերից մեկը Հաղարծնի վանքն է, որը հիմնադրվել է X դարում և իր ծաղկման շրջանն ապրել XIII դարում։ Այդ ժամանակ վանքը դարձել էր միջնադարյան Հայաստանի խոշորագույն հոգևոր և կրթական կենտրոններից մեկը, որտեղ զարգանում էին աստվածաբանությունը, մատենագրությունն ու ձեռագրարվեստը։ Առանձնահատուկ նշանակություն ունեն վանքի տարածքում պահպանված հայոց արքաներ Սմբատի և Գագիկի, ինչպես նաև Լոռու թագավորությունը կառավարած Կյուրիկյան արքայատոհմի ներկայացուցիչների շիրիմները։

Ոչ պակաս նշանակալի հուշարձան է Գոշավանքը, որը XII դարի վերջում հիմնադրել է հայ մեծ մտածող, աստվածաբան, իրավագետ և առակագիր Մխիթար Գոշը։ Կարճ ժամանակում վանքը վերածվել է Հայաստանի խոշորագույն գիտակրթական կենտրոններից մեկի։ Այստեղ գործել է հայտնի վարդապետարան, որտեղ դասավանդվել են աստվածաբանություն, փիլիսոփայություն, իրավունք, պատմություն, ճարտասանություն, մանրանկարչություն, երաժշտություն և ձեռագրերի արտագրության արվեստ։ Հենց Մխիթար Գոշն է կազմել հայկական առաջին դատաստանագիրքը, որը մի քանի դար շարունակ հիմք է ծառայել հայկական իրավական համակարգի համար։ Վանքին առանձնահատուկ համբավ են բերել վարպետ Պողոսի կերտած հանրահայտ «ժանյակազարդ» խաչքարերը, որոնք համարվում են միջնադարյան հայկական քարարվեստի գլուխգործոցներ։

Տարածաշրջանի պատմական ժառանգությունը ներդաշնակորեն միահյուսվում է նրա հարուստ բնության հետ։ Դիլիջանի հին թաղամասը պահպանել է XIX դարի ճարտարապետությունը՝ փայտաշեն փորագրված պատշգամբներով և արհեստավորների արհեստանոցներով։ Դիլիջանի ազգային պարկի անտառների խորքում գտնվում է Պարզ լիճը՝ Հայաստանի ամենագեղատեսիլ լճերից մեկը։ Այստեղ գործում է նաև կովկասյան ազնվացեղ եղջերուների վերականգնման և բազմացման կենտրոնը, որը ստեղծվել է այս հազվագյուտ տեսակի պոպուլյացիան վերականգնելու նպատակով։

Երթուղին եզրափակվում է տարածաշրջանի գինեգործական ավանդույթներին ծանոթությամբ՝ 1951 թվականին հիմնադրված Իջևանի գինու և կոնյակի գործարանում։ Այսօր այն Հայաստանի առաջատար գինեգործական ձեռնարկություններից մեկն է՝ շարունակելով երկրի հյուսիսարևելյան հատվածի բազմադարյա գինեգործական ավանդույթները։ Շրջայցի ընթացքում ներկայացվում են գործարանի պատմությունը, գինու և կոնյակի արտադրության գործընթացը, ինչպես նաև ըմպելիքների հնեցումը կաղնե տակառներում։ Համտեսը հնարավորություն է տալիս գնահատել Հայաստանի հնագույն գինեգործական ձեռնարկություններից մեկի արտադրանքը։

---

ՈՒղևորության մանրամասներ

Արժեքի մեջ ներառված է

Վճարվում է առանձին

Արժեքի հաշվարկ և նախնական ամրագրում

Էքսկուրսիայի արժեքը կախված է մասնակիցների քանակից, ընտրված տրանսպորտից և լրացուցիչ ծառայություններից։ Առցանց հաշվիչը ավտոմատ կհաշվարկի ճանապարհորդության արժեքը և ցույց կտա հասանելի ամսաթվերը։

💬 Հարց ունե՞ք տուրի վերաբերյալ

📚 Երթուղու տարածաշրջանների մասին