Հայաստանի այցեքարտերը. Գառնի, Քարերի սիմֆոնիա և Գեղարդավանք
📍Վայրը՝ Կոտայք
Շրջագայությունը հրաշալի հնարավորություն է բացահայտելու Հայաստանի ամենահայտնի տեսարժան վայրերից մի քանիսը։ Ձեզ սպասում են Գառնիի հեթանոսական տաճարը, ժայռի մեջ կերտված Գեղարդավանքը և բնության ստեղծած բացառիկ հրաշքը՝ Քարերի սիմֆոնիան։ Ճանապարհորդության ընթացքում կծանոթանաք Հայաստանի հարուստ պատմությանը, կվայելեք գեղատեսիլ կիրճերի տեսարանները և կզգաք այն յուրահատուկ մթնոլորտը, որտեղ բնությունն ու մարդկային ստեղծագործությունը միաձուլվում են մեկ ամբողջության մեջ։
Չարենցի կամար կամ «Մասիսի խորան»
Երթուղու առաջին կանգառը կլինի այս յուրահատուկ ճարտարապետական հուշարձանը, որտեղից բարենպաստ եղանակին բացվում է Արարատ լեռան հիասքանչ տեսարանը։ 1957 թվականին ճարտարապետ Ռաֆայել Իսրայելյանի նախագծած կամարը համարվում է հայկական ճարտարապետության հետաքրքիր ստեղծագործություններից մեկը։ Տեղում գիդը կպատմի, թե ինչու է այս հուշարձանն ունեցել երկու անվանում։
Գառնի՝ հայոց արքաների ամառային նստավայր
Գառնի գյուղը պահպանում է եզակի պատմամշակութային համալիր, որտեղ միահյուսված են պատմությունը, ճարտարապետությունն ու բնության գեղեցկությունը։ Համալիրի կազմում են ամրոցը, որի տարածքում գտնվում էին արքայական պալատը, մ.թ. I դարի հեթանոսական տաճարը և III դարի բաղնիքը։ Տաճարի հարևանությամբ պահպանվել են նաև VII դարի Սուրբ Սիոն եկեղեցու ավերակները, որոնք վկայում են այս վայրի շարունակական հոգևոր նշանակության մասին։
Համալիրը մ.թ.ա. III դարից ծառայել է որպես հայոց արքաների ամառային նստավայր, իսկ տաճարը նվիրված էր հայկական Միհր աստծուն կամ պարթևական Միթրային՝ լույսի և արդարության խորհրդանիշին։
Գառնիում զբոսնելիս հեշտ է զգալ հնության շունչը․ տաճարի վեհաշուք սյուները, ամրոցի հզոր պարիսպները, հռոմեական ոճի բաղնիքի մնացորդներն ու եկեղեցու ավերակները ստեղծում են մի միջավայր, որտեղ հանդիպում են տարբեր դարաշրջաններ։ Դիտահարթակներից բացվում են Ազատ գետի կիրճի և շրջակա լեռների տպավորիչ տեսարանները։
Քարերի սիմֆոնիա
Սա Հայաստանի ամենատպավորիչ բնական հուշարձաններից մեկն է, որը գտնվում է Գառնիի մոտ՝ Ազատ գետի կիրճում։ Հսկայական բազալտե սյուները ձևավորվել են հնագույն հրաբխային գործընթացների արդյունքում։ Նրանց կանոնավոր երկրաչափությունն ու հզոր տեսքը ստեղծում են քարե սիմֆոնիայի տպավորություն, կարծես բնությունն ինքն է կառուցել այս հսկայական «երգեհոնի փողերը»։
Սյուների միջև քայլելիս կարելի է զգալ բնության ուժն ու վայելել ձևերի ներդաշնակությունը։ Առավոտյան և մայրամուտի լույսի ներքո բազալտը ստանում է նուրբ արծաթագույն երանգներ՝ առավել ընդգծելով այս բնական հրաշքի գեղեցկությունը։ «Քարերի սիմֆոնիան» իրավամբ համարվում է Հայաստանի ամենագեղատեսիլ և լուսանկարվող վայրերից մեկը։
Գեղարդավանք կամ Այրիվանք
Հայաստանի ամենագեղատեսիլ վայրերից մեկում, Երևանից ոչ հեռու, գտնվում է Գեղարդավանքը, որը հայտնի է նաև որպես Այրիվանք։ Այս բացառիկ վանական համալիրը ստեղծում է մեկուսի սրբավայրի տպավորություն, որտեղ ճարտարապետությունը ներդաշնակորեն միաձուլվում է ժայռերին։
Թեև վանքը հիմնադրվել է IV դարում, պահպանված շինությունների մեծ մասը կառուցվել է XII–XIII դարերում։ Խցերը, մատուռներն ու եկեղեցիները մասամբ փորված են ժայռի մեջ, իսկ համալիրի եկեղեցիներից մեկում ժայռի խորքից բխում է աղբյուր, որը դեռևս նախաքրիստոնեական ժամանակներից համարվել է սրբազան։
«Գեղարդավանք» անվանումը նշանակում է «Գեղարդի վանք»՝ ի պատիվ Սուրբ Գեղարդի, որը շուրջ հինգ դար պահվել է այստեղ։ Վանքի գլխավոր առանձնահատկությունը ճարտարապետության և բնական ժայռային միջավայրի կատարյալ ներդաշնակությունն է։ Իր հարուստ պատմության, ինքնատիպ ճարտարապետության և հոգևոր նշանակության շնորհիվ Գեղարդավանքը ներառված է ՅՈՒՆԵՍԿՕ-ի համաշխարհային ժառանգության ցանկում և համարվում է Հայաստանի ամենատպավորիչ վանական համալիրներից մեկը։
Ծառայություններ և պայմաններ
🌦️ Հասանելի է ամբողջ տարվա ընթացքում | ⏳ 6-7 ժամ | ↔️ Հեռավորությունը՝ մոտ 96 կմ
Արժեքի մեջ ներառված է՝
Հարմարավետ տրանսպորտ
Որակավորված զբոսավարի ծառայություններ
🎟️ Գառնի պատմամշակութային համալիրի և «Քարերի սիմֆոնիա» բնության հուշարձանի մուտքի տոմսեր
Շշալցված ջուր
Կանգառներ գեղատեսիլ վայրերում լուսանկարվելու համար
Ազատ ժամանակ ճաշի և հանգստի համար
Զեղչեր երեխաների, դպրոցականների և մի շարք սոցիալական խմբերի համար
Արժեքի հաշվարկ և նախնական ամրագրում
❗Ամրագրումը կատարվում է էքսկուրսիայի օրվանից ոչ ուշ, քան 36 ժամ առաջ։