Պատմության, բնության և համերի ներդաշնակությունը Սևանի ափին.
📍Վայրը՝ Գեղարքունիք
Սևանա լճի ափերով այս հետաքրքիր ճանապարհորդությունը հնարավորություն կտա տեսնել միջնադարյան վանքեր, խորհրդավոր բերդ, լեգենդար խաչքարեր և համտեսել անուշաբույր տեղական պանիրներ։ Վայելեք պատմության, բնության և համերի ներդաշնակությունը Սևանի ափին։ Իսկ ամռանը ցանկության դեպքում կարող եք նաև լողալ Սևանա լճում կամ զբոսնել զբոսանավով։
Սևանավանք
Սևանավանքը Հայաստանի ամենագեղատեսիլ և պատմական նշանակություն ունեցող վանական համալիրներից մեկն է, որը գտնվում է Սևանա լճի հյուսիս-արևմտյան ափի թերակղզում։ Այն հիմնադրվել է 874 թվականին Աշոտ Ա Բագրատունու դստեր` իշխանուհի Մարիամ Բագրատունու կողմից և սկզբում գտնվում էր փոքր կղզու վրա։ XX դարում լճի մակարդակի զգալի իջեցումից հետո կղզին վերածվեց թերակղզու, սակայն տեղացիները մինչ օրս այն անվանում են «կղզի»։ Վանքը կառուցված է սև տուֆից, ինչը նրան հաղորդում է խիստ, բայց վեհ տեսք և հավանաբար հիմք է դարձել «Սև վանք» անվան համար։
Հայրավանք
Հայրավանքը Հայաստանի ամենագեղատեսիլ և առանձնահատուկ մթնոլորտ ունեցող վանական համալիրներից մեկն է, որը գտնվում է Սևանա լճի արևմտյան ափի ժայռոտ հրվանդանի վրա:։ Նրա պատմությունը սկիզբ է առնում IX դարից, իսկ ճարտարապետությունը համադրում է վաղ միջնադարյան հայկական ճարտարապետության տարրերը XIII դարի բնորոշ առանձնահատկությունների հետ։
Հայրավանքը ոչ միայն ճարտարապետական հուշարձան է, այլև վայր, որտեղ կարելի է վայելել Սևանա լճի և շրջակա լեռների հիասքանչ տեսարանները, զգալ դարերի խորքից եկող հոգևոր ուժն ու խաղաղությունը։
Բերդկունք ամրոց
Բերդկունք ամրոցը հայկական միջնադարյան ռազմական ճարտարապետության հազվագյուտ հուշարձաններից է, որը գտնվում է Սևանա լճի արևելյան ափին։ Նրա ռազմավարական դիրքը բարձունքի վրա հնարավորություն էր տալիս վերահսկել կարևոր առևտրական ճանապարհները և պաշտպանվել արտաքին վտանգներից։
Հնագիտական տվյալների համաձայն՝ ամրոցը հիմնադրվել է X դարում Բագրատունյաց Հայաստանի ժամանակաշրջանում։ Սակայն համալիրի տարածքում հայտնաբերվել են նաև ավելի վաղ ժամանակաշրջաններին՝ մ.թ.ա. II–I հազարամյակներին վերաբերող շերտեր, որոնք վկայում են բնակավայրի բազմաշերտ պատմության մասին։
Ամրոցի բարձունքից բացվում է Սևանա լճի և շրջակա լեռնային բնապատկերների հիասքանչ տեսարանը, որը թույլ է տալիս զգալ բնության և պատմության ներդաշնակությունը։
Նորատուսի խաչքարադաշտ
Նորատուսը Գեղարքունիքի մարզի հնագույն բնակավայրերից մեկն է, որը հայտնի է իր եզակի միջնադարյան գերեզմանոցով։ Մոտ 7 հեկտար տարածքի վրա պահպանվել է շուրջ 1000 խաչքար։ Ամենահին խաչքարերը թվագրվում են V–IX դարերով, իսկ մեծ մասը՝ XIII–XIV դարերով։
Յուրաքանչյուր խաչքար ոչ միայն տապանաքար է, այլև արվեստի բացառիկ գործ։ Դրանցից շատերը զարդարված են գյուղական կյանքի, արհեստների, երաժշտական գործիքների, խաղողի ողկույզների և նռների պատկերներով, որոնք հնարավորություն են տալիս պատկերացում կազմել միջնադարյան Հայաստանի կենցաղի և ավանդույթների մասին։
Տեղեկատվական կենտրոն
Աշխատանքային օրերին (❗) հնարավոր է այցելել «Սևան» ազգային պարկի տեղեկատվական կենտրոն և ծանոթանալ տարածաշրջանի առանձնահատկություններին, ինչպես նաև Սևանա լճի բնապահպանական խնդիրներին։
Միքայելյանների ընտանեկան պանրատուն (ըստ ցանկության)
Ընտանեկան պանրատանը պատրաստվում են բացառիկ տեսակի պանիրներ, այդ թվում՝ հայկական ավանդական «օրաց» պանիրը։ Դրանց մեծ մասը արտադրվում է հատուկ տեխնոլոգիաներով։ Տեղում գործում է հարմարավետ սրահ այցելուների համար, որտեղ էքսկուրսիայի ընթացքում ներկայացվում են պանրագործության գաղտնիքներն ու ավանդույթները։
Այցելուները հնարավորություն ունեն համտեսելու տարբեր տեսակի պանիրներ, ծանոթանալու դրանց պատրաստման գործընթացին և գնահատելու յուրահատուկ համը։ Առաջարկվում են երկու համտեսի փաթեթներ՝ «փոքր» (5 տեսակի պանիր) և «մեծ» (10 տեսակի պանիր՝ գինու, հատուկ սոուսների և հավելումների ուղեկցությամբ)։
Ծառայություններ և պայմաններ
🌦️ Հասանելի է ամբողջ տարվա ընթացքում | ⏳ 7–8 ժամ | ↔️ Հեռավորությունը՝ մոտ 250 կմ
Արժեքի մեջ ներառված է՝
Հարմարավետ տրանսպորտ
Որակավորված զբոսավարի ծառայություններ
Շշալցված ջուր
Կանգառներ գեղատեսիլ վայրերում լուսանկարվելու համար
Ազատ ժամանակ ճաշի և հանգստի համար
Զեղչեր երեխաների, դպրոցականների և մի շարք սոցիալական խմբերի համար
Վճարվում է առանձին
🍽️ Ճաշ
🧀 Պանրի համտես
- Փոքր փաթեթ (5 տեսակի պանիր) — 5000 դրամ
- Մեծ փաթեթ (10 տեսակի պանիր) — 8000 դրամ
🚤 Զբոսանք ջրային տրանսպորտով
Արժեքի հաշվարկ և նախնական ամրագրում
❗Ամրագրումը կատարվում է էքսկուրսիայի օրվանից ոչ ուշ, քան 36 ժամ առաջ։